Qozog‘istonning Chimkent shahrida “Do‘stlik dasturxoni” nomi ostida palov festivali o‘tkazildi. “Nur.kz” xabariga ko‘ra, tadbir Janubiy Qozog‘iston viloyati O‘zbek madaniyat markazi tomonidan tashkil etilgan.
Festivalda nafaqat Janubiy Qozog‘iston viloyatining turli tumanlaridan tashrif buyurgan oshpazlar, balki O‘zbekiston poytaxti Toshkent shahridan taklif etilgan palov ustalari ham qatnashdi. Festival vaqtida bir vaqtning o‘zida 27 qozonda palov damlandi.
“Chimkentcha, toshkentcha, sayramcha, farg‘onacha, buxorocha, samarqandcha, kunjut yog‘ida tayyorlangan xorazmcha, bayramona — festivalda tayyorlangan palov turlarini sanab, sanog‘iga yetib bo‘lmaydi”, — deb yozadi “Nur.kz” internet-nashri.
Festivalda birinchi o‘rinni G‘ulomjon G‘aniyev qo‘lga kiritdi. Uch marta Chimkent shahar kengashiga deputat etib saylangan G‘aniyev professional oshpaz bo‘lmasa-da, qayd etishlaricha, o‘zi tayyorlayotgan palovga do‘sti Makkadan olib kelgan suvni qo‘shgani uchun g‘alaba qozongan.
35 yildan beri deyarli har kuni palov pishiradigan toshkentlik oshpaz Shokirov Zoidov esa o‘zi tayyorlagan 10 kilogramm “to‘y oshi” bilan ikkinchi, sayramlik Nasibulla Xoliqov esa Tojikistondagi shahar sharafiga “Qo‘rg‘ontepa” deb nomlangan palovi bilan uchinchi o‘rinni egalladi.
Festivalda ilk bor bolalar — Chimkentdagi Hamza nomli 53-maktabning 7-sinf o‘quvchilari ham qatnashdi. Bekjon Akramov va Berdiyor Hoshimjonov rahbarligidagi besh kishilik jamoa amalda birinchi marta osh damladi.
Izoh (0)