NASA мутахассислари 31 октябрь куни Ерга жуда яқин масофада учиб ўтадиган улкан астероидни аниқлади. 2015 TB145 номини олган осмон жисми Гавайи оролларидаги Pan-STARRS автоматик тизими томонидан аниқланди, деб хабар беради Gizmag.
Олимлар астероид Ердан 499 минг километр узоқликдан учиб ўтишини қайд этди, бу Ердан Ойгача бўлган масофадан 1,3 баравар катта дегани. Астероиднинг тезлиги сониясига 35 километрни ташкил этади. Таққослаш учун, 2013 йил Челябинскга тушган метеорит сониясига 19 километр тезлик билан ҳаракатланган, унинг ўлчами эса 17 метрдан ошмаган эди.
Мутахассислар ҳисоб-китобига кўра, 2015 TB145 астероидининг диаметри 280 дан 620 метргача етиши мумкин. Унинг ноодатий траекторияси ва юқори тезлиги сабаб NASA олимлари астероидни олдинроқ пайқамаган. Шунга қарамай, улар осмон жисмининг Ерга хавф солмаслигини таъкидламоқда.
Бундай катта ўлчамдаги кейинги астероид — 1999 AN10 Ер яқинидан 2027 йилда учиб ўтади. Охирги марта бундай осмон жисми Ерга бунчалик яқин масофада 2006 йилда учиб ўтганди.
Изоҳ (0)