Zambiyada 18-oktabr, yakshanba kuni milliy bayram bo‘lib o‘tadi — mamlakatdagi barcha barlar, tungi klublar va ko‘ngilochar maskanlar yopiladi, milliy futbol uyushmasi esa shu kunga belgilangan barcha uchrashuvlarni boshqa sanaga qoldirgan. Bu haqda “Exo Moskvi” xabar bermoqda.
Mamlakat prezidenti Edgar Lungu xalqni shu kuni milliy valyuta qadri qayta tiklanishi uchun ibodat qilishga chaqirgan. Bloomberg xabariga ko‘ra, Zambiyaning barcha ibodatxonalarida mamlakat milliy pul birligi — kvachaga bag‘ishlangan ibodat marosimlari bo‘lib o‘tadi.
“Kvachaning qadrsizlanishi alohida mahsulotlarning 30—100 foizga qimmatlashishiga sabab bo‘ldi. Hukumatning choralari samara bermayapti, yoqilg‘i narxining oshirilishi esa vaziyatni yanada og‘irlashtiradi. Bizga ilohiy yordam kerak”, — dedi poytaxt Lusakadagi cherkovlardan birining yepiskopi.
Yil boshidan beri kvacha AQSh dollariga nisbatan 45 foizga qadrsizdandi, bu Bloomberg kuzatib borayotgan jahonning 155 valyutasi orasidagi rekord ko‘rsatkichdir.
Qayd etishlaricha, milliy valyutaning qadrsizlanuviga jahon bozorida Zambiyaning asosiy eksport mahsuloti — misning narxi 20 foizga tushib ketgani, shuningdek, mamlakatdagi qurg‘oqchilik va hosilsizlik sabab bo‘lmoqda.
Izoh (0)