Замбияда 18 октябрь, якшанба куни миллий байрам бўлиб ўтади — мамлакатдаги барча барлар, тунги клублар ва кўнгилочар масканлар ёпилади, миллий футбол уюшмаси эса шу кунга белгиланган барча учрашувларни бошқа санага қолдирган. Бу ҳақда «Эхо Москви» хабар бермоқда.
Мамлакат президенти Эдгар Лунгу халқни шу куни миллий валюта қадри қайта тикланиши учун ибодат қилишга чақирган. Bloomberg хабарига кўра, Замбиянинг барча ибодатхоналарида мамлакат миллий пул бирлиги — квачага бағишланган ибодат маросимлари бўлиб ўтади.
«Квачанинг қадрсизланиши алоҳида маҳсулотларнинг 30—100 фоизга қимматлашишига сабаб бўлди. Ҳукуматнинг чоралари самара бермаяпти, ёқилғи нархининг оширилиши эса вазиятни янада оғирлаштиради. Бизга илоҳий ёрдам керак», — деди пойтахт Лусакадаги черковлардан бирининг епископи.
Йил бошидан бери квача АҚШ долларига нисбатан 45 фоизга қадрсизданди, бу Bloomberg кузатиб бораётган жаҳоннинг 155 валютаси орасидаги рекорд кўрсаткичдир.
Қайд этишларича, миллий валютанинг қадрсизланувига жаҳон бозорида Замбиянинг асосий экспорт маҳсулоти — миснинг нархи 20 фоизга тушиб кетгани, шунингдек, мамлакатдаги қурғоқчилик ва ҳосилсизлик сабаб бўлмоқда.
Изоҳ (0)