Qirg‘izistondagi tergov izolyatoridan qochib ketganlarning 7 nafari bir umrlik qamoq jazosini o‘tayotgan bo‘lgan

Qirg‘izistonda tergov izolyatoridan qochgan to‘qqiz mahkumning yetti nafari bir umrlik qamoqqa hukm qilingan bo‘lgan. Bu haqda Respublika Jazoni ijro etish davlat xizmati tezkor-rejimli bosh boshqarmasi boshlig‘i Salomat Abdiyev ma’lum qildi, deb yozadi “RIA Novosti”.

Uning so‘zlariga ko‘ra, qochish vaqtida turma sifatida ham ishlatiladigan tergov izolyatorida chiroq bo‘lmagan va videokameralar ishlamagan. “Ular ma’muriy bino orqali qochib ketgan, hozircha bunga qay tarzda muvaffaq bo‘lishganini bilmaymiz”, — dedi u.

Eslatib o‘tamiz, Qirg‘izistonning Chuy viloyatida 12-oktabr, dushanbaga o‘tar kechasi 50-raqamli tergov izolyatoridan to‘qqiz nafar mahkum uch nafar qo‘riqchini o‘ldirib, qochib ketdi. Bundan tashqari, jazoni ijro etish muassasasining bir nafar xodimi yaralangan. Politsiya tez orada olib qochilgan avtomobilni topib, besh nafar jinoyatchini qo‘lga oldi. Qolgan to‘rt jinoyatchi ozodlikda qolmoqda.