Boliviya parlamenti 26-sentabr, shanba kuni mamlakat prezidenti Evo Moralesning to‘rtinchi prezidentlik muddatiga o‘z nomzodini qo‘yish huquqini beruvchi qonunni qabul qildi. Bu haqda “RBK” xabar bermoqda.
Qabul qilingan qonun konstitutsiyaning prezidentlik muddati cheklovi borasidagi qismiga o‘zgartirish kiritishi kerak. “Bu abadiy prezident bo‘lish mumkinligini bildirmaydi”, — dedi Morales Nyu-Yorkda jurnalistlar bilan uchrasharkan — u bu yerga BMT Bosh Assambleyasi 70-sessiyasida qatnashish uchun kelgan.
Morales Boliviya hokimiyati tepasiga 2006-yilda kelgan bo‘lib, uning xalq orasidagi reytingi 60 foizga yaqin. Uning ta’kidlashicha, u quvonch bilan prezidentlik lavozimini tark etgan bo‘lardi, biroq tarafdorlari uning bunday qilishiga yo‘l qo‘ymayapti.
Parlament konstitutsiyaga kiritiladigan o‘zgarishlarni qabul qilganidan so‘ng, ular 2016-yil fevralida bo‘ladigan referendumda ratifikatsiya qilinishi kerak. Moralesning aytishicha, agar ko‘pchilik konstitutsiyaviy o‘zgarish uchun ovoz bersa, u 2019-yili to‘rtinchi prezidentlik muddati uchun o‘z nomzodini qo‘yadi.
Izoh (0)