Боливия парламенти 26 сентябрь, шанба куни мамлакат президенти Эво Моралеснинг тўртинчи президентлик муддатига ўз номзодини қўйиш ҳуқуқини берувчи қонунни қабул қилди. Бу ҳақда «РБК» хабар бермоқда.
Қабул қилинган қонун конституциянинг президентлик муддати чеклови борасидаги қисмига ўзгартириш киритиши керак. «Бу абадий президент бўлиш мумкинлигини билдирмайди», — деди Моралес Нью-Йоркда журналистлар билан учрашаркан — у бу ерга БМТ Бош Ассамблеяси 70-сессиясида қатнашиш учун келган.
Моралес Боливия ҳокимияти тепасига 2006 йилда келган бўлиб, унинг халқ орасидаги рейтинги 60 фоизга яқин. Унинг таъкидлашича, у қувонч билан президентлик лавозимини тарк этган бўларди, бироқ тарафдорлари унинг бундай қилишига йўл қўймаяпти.
Парламент конституцияга киритиладиган ўзгаришларни қабул қилганидан сўнг, улар 2016 йил февралида бўладиган референдумда ратификация қилиниши керак. Моралеснинг айтишича, агар кўпчилик конституциявий ўзгариш учун овоз берса, у 2019 йили тўртинчи президентлик муддати учун ўз номзодини қўяди.
Изоҳ (0)