Toshkentda bo‘lib o‘tgan «O‘zbekiston — Qozog‘iston: savdo missiyasi» biznes-forumida ikki mamlakat o‘rtasida 27 million dollarga teng bitimlar imzolandi. Bu haqda “UzDaily” xabar bermoqda.
O‘zbekiston Savdo-sanoat palatasi hamda Qozog‘iston eksport va investitsiyalar milliy agentligi hamkorligida tashkil etilgan mazkur biznes-forumda Qozog‘istonning mashinasozlik, metallurgiya, kimyo, qurilish, farmatsevtika va oziq-ovqat sohasida faoliyat yurituvchi 25 ga yaqin korxonasi vakillari ishtirok etdi.
Tadbir yakunlari bo‘yicha O‘zbekistonga transformator, shveller, geosintetik qurilish materiallari, qadoqlash, farmatsevtika, lok-bo‘yoq va dasturiy ta’minot mahsulotlari yetkazib berish yuzasidan 27 million dollarlik eksport bitimlari imzolandi.
Eslatib o‘tamiz, biznes-forumda «Kazkosmos» mutaxassislari KazEOSat-1 va KazEOSat-2 kosmik qurilmalarining imkoniyatlarini ham namoyish etdi. Bu boradagi hamkorlik to‘g‘risidagi bitim 27-noyabr kuni Ostonada bo‘lib o‘tadigan «Qozog‘istonda koinot kunlari — 2015» III xalqaro seminarida imzolanishi kutilmoqda.
Qozog‘istonning O‘zbekiston bilan tashqi savdo aylanmasi 2014-yilda 2,1 milliard dollardan iborat bo‘ldi, bunda Qozog‘iston eksporti 1,1 milliard dollarni tashkil etdi.
Izoh (0)