Тошкентда бўлиб ўтган «Ўзбекистон — Қозоғистон: савдо миссияси» бизнес-форумида икки мамлакат ўртасида 27 миллион долларга тенг битимлар имзоланди. Бу ҳақда «UzDaily» хабар бермоқда.
Ўзбекистон Савдо-саноат палатаси ҳамда Қозоғистон экспорт ва инвестициялар миллий агентлиги ҳамкорлигида ташкил этилган мазкур бизнес-форумда Қозоғистоннинг машинасозлик, металлургия, кимё, қурилиш, фармацевтика ва озиқ-овқат соҳасида фаолият юритувчи 25 га яқин корхонаси вакиллари иштирок этди.
Тадбир якунлари бўйича Ўзбекистонга трансформатор, швеллер, геосинтетик қурилиш материаллари, қадоқлаш, фармацевтика, лок-бўёқ ва дастурий таъминот маҳсулотлари етказиб бериш юзасидан 27 миллион долларлик экспорт битимлари имзоланди.
Эслатиб ўтамиз, бизнес-форумда «Казкосмос» мутахассислари KazEOSat-1 ва KazEOSat-2 космик қурилмаларининг имкониятларини ҳам намойиш этди. Бу борадаги ҳамкорлик тўғрисидаги битим 27 ноябрь куни Остонада бўлиб ўтадиган «Қозоғистонда коинот кунлари — 2015» III халқаро семинарида имзоланиши кутилмоқда.
Қозоғистоннинг Ўзбекистон билан ташқи савдо айланмаси 2014 йилда 2,1 миллиард доллардан иборат бўлди, бунда Қозоғистон экспорти 1,1 миллиард долларни ташкил этди.
Изоҳ (0)