Yaponiya poytaxti Tokio shahrida 24-sentabr kuni ochilgan JATA Tourism Expo Japan – 2015 xalqaro sayyohlik ko‘rgazmasida O‘zbekistonning sayyohlik salohiyati keng namoyish etilmoqda, deb xabar beradi O‘zA.
O‘zbekiston sayyohlik va tarixiy joylar bo‘yicha dunyodagi yetakchi o‘n mamlakat qatorida turadi. O‘zbekiston hududida 7 mingdan ortiq tarixiy yodgorliklar bo‘lib, ularning aksariyati YuNESKOning Butunjahon merosi ro‘yxatiga kiritilgan.
“O‘zbekturizm” milliy kompaniyasi O‘zbekistonning sayyohlik salohiyatini jahonga keng tanitish maqsadida qator xalqaro kompaniyalar bilan yaqin hamkorlik qilib kelmoqda. Dunyo miqyosidagi ko‘rgazma va yarmarkalarda faol ishtirok etmoqda.
1977-yildan buyon o‘tkazib kelinayotgan JATA Tourism Expo Japan dunyodagi eng nufuzli xalqaro ko‘rgazmalardan hisoblanadi. Bu yilgi forumda 150 dan ortiq mamlakatdan mingdan ziyod firma va kompaniyalar vakillari, ekspert va olimlar ishtirok etmoqda. Ko‘rgazma sayyohlik sanoatining barcha zamonaviy yo‘nalishlarini o‘zida mujassam etgan. Unda biznes, ekzotika, ekologik, sport va ma’rifiy sayohat, kruiz, mehmonxona va restoran servisi, sog‘lomlashtirish kabi yo‘nalishlarga oid o‘nlab bo‘limlar ish olib bormoqda.
“O‘zbekturizm” kompaniyasidan ma’lum qilishlaricha, ko‘rgazmada O‘zbekiston milliy stendi o‘zining betakror dizayni bilan ishtirokchilar va mutaxassislar e’tiborini tortmoqda.
“Mamlakatimizning go‘zal maskanlari va tarixiy obidalari tasvirlangan, milliy matolar va atributlar bilan bezatilgan stend yurtimiz haqida yorqin tasavvur uyg‘otadi. Samarqand, Buxoro, Xiva, Toshkent, Shahrisabz, Termiz, Qarshi, Marg‘ilon, Nukus kabi shaharlarning diqqatga sazovor joylari haqidagi ma’lumotlar va suratlarni o‘z ichiga olgan albomlar, buklet va nashrlar, shuningdek, xalq badiiy hunarmandligi va amaliy san’ati mahsulotlari, turfa suvenirlar yarmarka ishtirokchilari e’tiboriga havola etilmoqda. O‘zbekistonning qadimiy va zamonaviy shaharlari, boy madaniyati va tarixi, milliy libos va mumtoz taronalari ko‘rgazma qatnashchilarida katta qiziqish uyg‘otmoqda”, — deyiladi O‘zA xabarida.
JATA Tourism Expo Japan – 2015 xalqaro sayyohlik ko‘rgazmasida O‘zbekistonning “O‘zbekturizm”, “O‘zbekiston havo yo‘llari”, “Buyuk ipak yo‘li”, Marco Polo Central Asia Travel, Megatour, Darvesh Tour Service, Sheherezade Voyages, Samarkand Global Star, Sitara International, Anur Tour kabi kompaniya va tashkilotlari ishtirok etmoqda.
Ko‘rgazma doirasida “O‘zbekturizm” milliy kompaniyasi, O‘zbekistonning Yaponiyadagi elchixonasi, Yaponiya sayyohlik agentliklari uyushmasi (JATA) va Yaponiya xalqaro hamkorlik agentligi (JICA) hamkorligida O‘zbekistonning sayyohlik salohiyatiga bag‘ishlangan forum o‘tkazilishi mo‘ljallangan.
Izoh (0)