Suriyalik isyonchilar Rossiyaga “yangi Afg‘oniston bo‘lish” bilan tahdid qilmoqda

Bashar Asadga qarshi kurash olib borayotgan suriyalik isyonchilar Rossiyaga “yangi Afg‘onistonni uyushtirish” bilan tahdid qildi. Bu haqda, “Gazeta.ru”ning yozishicha, bir qator isyonchilar bilan internet orqali bog‘lanishga muvaffaq bo‘lgan Reuters agentligi xabar bermoqda.

Isyonchilarning fikricha, Rossiyaning Suriyadagi faolligi isyonchilarga Fors ko‘rfazi mamlakatlaridan, xususan, Saudiya Arabistonidan ko‘rsatilayotgan harbiy yordam hajmining oshishiga sabab bo‘lishi mumkin.

Reuters bilan suhbatlashgan isyonchilarning fikricha, Rossiyaning aralashuvi bir necha oqibatlarga sabab bo‘ladi. Birinchidan, qurolli nizo kengayib, yanada cho‘zilib ketishi mumkin. Ikkinchidan, mazkur nizo Saudiya Arabistoni va Eron o‘rtasidagi munosabatlarga bevosita ta’sir qiladi.

“Rossiya yangi Afg‘onistonga aralashib qolish masalasida tavakkal qilmoqda — Rossiya bu yerga o‘z qo‘shinlarini jo‘natadi, ular bu yerdan tobutlarda qaytishadi”, — dedi isyonchilardan biri.

AQShning fikricha, Suriya inqirozini faqat siyosiy yo‘l bilan hal qilish mumkin.