Gruziyaning Batumi shahrida tennis bo‘yicha sovrin jamg‘armasi 25 ming AQSh dollaridan iborat turnirning asosiy to‘r bahslari yakuniga yetib boryapti. Ushbu musobaqada bir yo‘la uch nafar o‘zbekistonlik tennischi ishtirok etayotgandi, deb xabar beradi “Olamsport”.
10-sentabrdagi bahslardan so‘ng ulardan faqat bir nafari bosh sovrin uchun kurashni davom ettirishi ma’lum bo‘ldi. Sabina Sharipovadan so‘ng turnirda to‘rtinchi raqam ostida harakat qilgan Oqgul Omonmurodova ham musobaqani tark etdi.
Aniqrog‘i, Omonmurodova ukrainalik Olga Yanchukka qarshi kechgan chorak final uchrashuvini yakuniga yetkaza olmadi. Birinchi setni 6:1 hisobida o‘z foydasiga hal qilgan Oqgul keyingisida 4:6 hisobida boy berdi. Hal qiluvchi uchinchi setning yettinchi geymidan so‘ng esa Omonmurodova bahsni davom ettira olmasligini ma’lum qildi. Bu vaqtga kelib ukrainalik tennischi 4:3 hisobida oldinda borayotgan edi.
Turnirda birinchi raqam ostida tasniflangan o‘zbekistonlik Nigina Abduraimova bugun, 11-sentabr kuni yarim final uchrashuvida kortga chiqadi. Kecha, 10-sentabr kuni chorak finalda gruziyalik Tinatin Kavalashvilini 6:1, 3:6, 6:1 hisobida dog‘da qoldirgan Nigina final ostonasida rossiyalik Alyona Tarasovaga qarshi kortga chiqadi.
Izoh (0)