AQShning Las-Vegas shahrida o‘tkazilayotgan jahon chempionatida o‘zbekistonlik yana bir sportchi finalga chiqdi, deb xabar beradi O‘zbekiston Milliy olimpiya qo‘mitasi matbuot xizmati.
Erkin kurash bo‘yicha vazni 65 kilogrammgacha bo‘lgan polvonlar bahsida O‘zbekiston sharafini munosib himoya qilayotgan Ixtiyor Navro‘zov 1/16 finalda Namibiya, 1/8 finalda Ukraina, chorak finalda Mo‘g‘uliston, yarim final bellashuvida esa 2014-yilgi jahon chempioni Soslan Ramonovni mag‘lub etib, finalga chiqdi.
Endi Ixtiyor Navro‘zov jahon chempionatining oltin medallari uchun italiyalik Frenk Chamizo Markes bilan bahs yuritadi. Mazkur uchrashuv bugun, 11-sentabr kuni bo‘lib o‘tadi.
Shunday qilib, mazkur jahon chempionatida Rustam Assakalovdan keyin Ixtiyor Navro‘zov ham sovrinli o‘rinlardan biri hamda 2016-yili Rio-de-Janeyro shahri (Braziliya)da o‘tkaziladigan Olimpiada o‘yinlari yo‘llanmasini naqd qilib qo‘ydi.
Bugun, 11-sentabrda ayollar kurashi bo‘yicha -60 kg vazn toifasida, erkin kurash bo‘yicha esa -61 kg, -86 kg, va -97 kg vaznda g‘olib va sovrindorlar nomi ma’lum bo‘ladi. Ushbu musobaqalarda o‘zbekistonlik sportchilardan Umidjon Ismanov (-86 kg) jahon chempionatining sovrinli o‘rinlari hamda Rio—2016 o‘yinlarining yo‘llanmasi uchun bahs yuritadi.
Izoh (0)