Грузиянинг Батуми шаҳрида теннис бўйича соврин жамғармаси 25 минг АҚШ долларидан иборат турнирнинг асосий тўр баҳслари якунига етиб боряпти. Ушбу мусобақада бир йўла уч нафар ўзбекистонлик теннисчи иштирок этаётганди, деб хабар беради «Оламспорт».
10 сентябрдаги баҳслардан сўнг улардан фақат бир нафари бош соврин учун курашни давом эттириши маълум бўлди. Сабина Шариповадан сўнг турнирда тўртинчи рақам остида ҳаракат қилган Оқгул Омонмуродова ҳам мусобақани тарк этди.
Аниқроғи, Омонмуродова украиналик Ольга Янчукка қарши кечган чорак финал учрашувини якунига етказа олмади. Биринчи сетни 6:1 ҳисобида ўз фойдасига ҳал қилган Оқгул кейингисида 4:6 ҳисобида бой берди. Ҳал қилувчи учинчи сетнинг еттинчи геймидан сўнг эса Омонмуродова баҳсни давом эттира олмаслигини маълум қилди. Бу вақтга келиб украиналик теннисчи 4:3 ҳисобида олдинда бораётган эди.
Турнирда биринчи рақам остида таснифланган ўзбекистонлик Нигина Абдураимова бугун, 11 сентябрь куни ярим финал учрашувида кортга чиқади. Кеча, 10 сентябрь куни чорак финалда грузиялик Тинатин Кавалашвилини 6:1, 3:6, 6:1 ҳисобида доғда қолдирган Нигина финал остонасида россиялик Алёна Тарасовага қарши кортга чиқади.
Изоҳ (0)