Amerikalik siyosatchi terrorchilardan himoyalanish maqsadida Kanada bilan chegarada devor qurishni taklif qildi

Nomzodi Respublikachilar partiyasidan AQSh prezidentligi uchun ilgari surilishi kutilayotgan Viskonsin shtati gubernatori Skott Uokerning so‘zlariga ko‘ra, shimoliy qo‘shni — Kanada bilan chegarada devor qurishdan AQSh manfaat topishi mumkin. Bu haqda “TASS” xabar bermoqda.

Jurnalistning AQShga terrorchilar kirib kelishi oldini olish maqsadida shunday devor qurilishi ehtimoliga qanday qaraysiz, qabilidagi savoliga Uoker shunday javob berdi: “Odamlar bizdan bu haqda Nyu-Gempshir shtatida so‘ragandi (shtatning shimoliy qismi Kanada bilan chegaradosh), ularda, shuningdek, huquqni muhofaza qilish organlari xodimlarida haqli xavotirlar tug‘ilmoqda. Shunday ekan, bu masalani ko‘rib chiqishga asos bor”.

Gubernatorning so‘zlariga ko‘ra, “AQShni terrorchilardan himoya qilish devor qurish va chegaralarni muhofaza qilish bilan tugamaydi”. “Bunda maxsus xizmatlarga terrorchilikka qarshi kurashda zarur barcha imkoniyatlarni ham taqdim etmoq kerak”, — dedi Uoker.

Avvalroq respublikachilar orasida saylovoldi poygasida yetakchilik qilayotgan milliarder Donald Tramp noqonuniy muhojirlardan himoyalanish maqsadida AQSh va Meksika chegarasida devor qurish tashabbusi bilan chiqqandi. Uning so‘zlariga ko‘ra, agar u prezident etib saylansa, Meksika hukumatini mazkur devor qurilishini moliyalashtirishga majbur qiladi.