Yaponiyaning Suzuki avtomobilsozlik kompaniyasi rahbariyati Germaniyaning Volkswagen konsernidan o‘zining barcha aksiyalarini sotib olishni rejalashtirmoqda. Bu haqda “Inform.kz” xabar bermoqda.
Kompaniya raisi Osamu Sudzukining so‘zlariga ko‘ra, aksiyalar Xalqaro savdo palatasi arbitraj sudi qaroriga muvofiq sotib olinadi. Ikki kompaniya o‘rtasida 2009-yilda o‘rnatilgan hamkorlik aloqalari esa uziladi.
2011-yili, Volkswagen ikki kompaniya o‘rtasidagi ishbilarmonlik aloqalarini uzishdan bosh tortganidan so‘ng, Suzuki arbitraj sudiga murojaat qilishga majbur bo‘lgandi.
Eslatib o‘tamiz, Volkswagen kompaniyasi yaponlarning rivojlanayotgan mamlakatlar bozori uchun arzon avtomobillar ishlab chiqarish sirini o‘rganish maqsadida 2009-yili Suzuki’ning 19,9 foiz aksiyasini sotib olgandi.
O‘z navbatida, Yaponiya kompaniyasi o‘z xodimlari tarkibi germaniyalik yuqori malakali mutaxassislar bilan to‘lishi hamda Volkswagen’ning ba’zi texnologiyalaridan foydalana olish huquqiga ega bo‘lishga umid qilgandi.
Izoh (0)