“O‘zavtosanoat” AK tizimidagi qo‘shma korxonalar soni yana bittaga ko‘payadigan bo‘ldi. Bu haqda “O‘zavtosanoat” matbuot xizmati xabar bermoqda.
O‘zbekiston Respublikasi Vazirlar Mahkamasining 2015-yil 20-iyuldagi qaroriga ko‘ra, mamlakat avtomobil sanoatini kelgusida yanada rivojlantirish, dvigatellar ishlab chiqarishda mahalliylashtirish darajasini yanada ko‘tarish maqsadida General Motors Powertrain-Uzbekistan AJning dvigatellari uchun alyuminiy qismlarni ishlab chiqarishga ixtisoslashgan UZAUTO-INZI qo‘shma korxonasi tashkil etildi.
Hujjatga ko‘ra, “O‘zavtosanoat” AK va INZI AMT Co., Ltd. (Koreya Respublikasi) kompaniyalari o‘rtasida bosim ostida alyumin detallarni yuqori aniqlikda quyish usulida ishlab chiqarishni tashkil etish bo‘yicha loyihani amalga oshirish haqidagi kelishuvga erishildi. Ushbu maqsadda nizom jamg‘armasi 10 million AQSh dollari ekvivalentiga teng bo‘lgan MChJ ko‘rinishidagi UZAUTO-INZI qo‘shma korxonasi tashkil etildi. Qo‘shma korxona 2017-yilning 1-yanvaridan mahsulot ishlab chiqarishni boshlaydi.
Shu munosabat bilan UZAUTO-INZI MChJ qo‘shma korxonasining ishlab chiqarish maydoni uchun 6,9 gektardan iborat yer maydoni taqdim etildi. Shundan 5,3 gektari General Motors Powertrain-Uzbekistan AJning qurilishdan holi hududiga to‘g‘ri keladi.
Tashkil etiladigan ishlab chiqarish hududida avtomobillar, dvigatellar va generatorlar uchun jami 43 turdagi butlovchi qismlar ishlab chiqarilishi rejalashtirilmoqda. Korxonaning yillik ishlab chiqarish quvvati 2,4 tonna alyuminiy quymasini qayta ishlashga teng.
Izoh (0)