Misr sudining “Al-Jazira” telekanali jurnalistlariga chiqargan hukmidan AQShning xafsalasi pir bo‘ldi va bundan xavotirda. Bu haqda, “Echo.msk.ru” xabariga ko‘ra, AQSh Davlat departamenti rasmiy vakili Jon Kirbi ma’lum qildi.
Uning so‘zlariga ko‘ra, AQSh Davlat departamenti Misr hukumatini “barqarorlik va taraqqiyot uchun zarur bo‘lgan fikr bildirish erkinligini yo‘qqa chiqaruvchi” mazkur hukmni o‘zgartirish uchun barcha kerakli choralarni ko‘rishga chaqiradi.
Avvalroq Yevropa tashqi siyosat mahkamasining rasmiy vakili “Al-Jazira” jurnalistlariga nisbatan chiqarilgan hukm fikr bildirish erkinligiga nisbatan zarba bo‘lganini ta’kidlagan edi.
Kuni kecha Misr sudi Qatarning “Al-Jazira” telekanalida ishlaydigan uch jurnalist — Kanada fuqarosi Muhammad Faxmiy, avstraliyalik jurnalist Piter Grist va misrlik prodyuser Bohir Muhammadni uch yilga ozodlikdan mahrum etish haqida hukm chiqargan edi.
Sudyaning qayd etishicha, mazkur jurnalistlar Misrdagi OAV xodimlari birlashmasida ro‘yxatdan o‘tmagan, maxsus xizmatlarning ruxsatnomasini olmasdan mamlakat hududiga asbob-uskunalarni olib kirgan, mehmonxonada noqonuniy ravishda translyatsiya nuqtasini o‘rnatgan. Sudyaning alohida ta’kidlashicha, sudlanuvchilar Misrdan “yolg‘on xabarlar”ni uzatgan.
Izoh (0)