Misr tashqi ishlar vazirligi Britaniyada 27 million dollarga sotilgan qadimiy yodgorlikni qaytarish bilan shug‘ullanadi

Misr qadimiy yodgorliklar va madaniy meros vazirligi mamlakat tashqi ishlar vazirligiga  to‘rt ming yillik tarixga ega kotib Sexemka haykali Buyuk Britaniyada kimoshdi savdosi orqali sotilganligi yuzasidan hujjatlarni topshirdi. Bu haqda “RIA Novosti” xabar berdi.

Ushbu haykal iyul oyida Christie’s auksionida 15,76 million funt streling evaziga (27 million dollardan ziyod) shaxsi oshkor etilmagan chet ellik kolleksionerga sotilgan. Uni o‘zida saqlanayotgan bebaho yodgorlik hisobiga ta’mirlash ishlarini amalga oshirishni mo‘ljallagan Britaniyadagi Nortgempton shahri muzeyi sotuvga qo‘ygan.

Haykal sotilganligidan xabar topgan Misr ma’murlari Britaniya rasmiylariga norozilik bildirdi. Qadimiy yodgorliklar va madaniy meros vaziri Mamdux ad-Dumati ro‘y bergan hodisani “Qadimiy Misr sivilizatsiyasiga qarshi jinoyat”, deb baholadi.