AQShlik shifokorga og‘riq qoldiruvchi dorilar uchun 1360 yillik qamoq jazosi tayinlanishi mumkin

Sud kaliforniyalik Xulio Gabriel Diazni og‘riq qoldiruvchi dorilarni noqonuniy tarqatishda aybdor, deb topdi. Bu haqda “Korrespondent.net” xabar beradi.

2011-yil mobaynida shifokor 1,7 million dozalarda OxyContin kabi kuchli og‘riq qoldiruvchi dorilar uchun retsept yozib bergan. AQSh prokuraturasi Los-Anjelesdagi vakilining so‘zlariga qaraganda, ayblanuvchining klinikasidagi bemorlarning ba’zilari giyohvand bo‘lgan. Bundan tashqari, bir qancha kishilar dori dozasining oshirib yuborilishi natijasida vafot etgan.

Tergov davomida so‘roq qilingan shifokor va farmatsevtlarning ta’kidlashicha, ular 67 yoshli Diaz yozib bergan shakldagi dorilar dozasi va birikmasini hech qachon ko‘rmagan.

Prokuratura Diazni 79 ta band bo‘yicha ayblamoqda. Unga maksimal muddat – 1360 yillik qamoq jazosi xavf solmoqda. Muddatning qisqartirilish ehtimoli bor.