O‘zbekiston Xotin-qizlar qo‘mitasi tomonidan O‘zbekiston mustaqilligining 24 yilligiga bag‘ishlab sog‘lomlashtirish aksiyasi o‘tkazildi, deb xabar beradi O‘zA.
Tadbirkorlar va ishbilarmonlar harakati – O‘zbekiston Liberal-demokratik partiyasining Olmazor tumani kengashi bilan hamkorlikda tashkil etilgan mazkur aksiya doirasida xotin-qizlar, alohida ehtiyojli oilalarning farzandlari chuqurlashtirilgan tibbiy ko‘rikdan o‘tkazildi.
O‘zbekiston Xotin-qizlar qo‘mitasi tomonidan mahallalarda joriy etilgan “Oilaga kirish” hamda “Salomatlik” jamoat tuzilmalarining oilaviy poliklinikalar, qishloq vrachlik punktlari shifokorlari bilan hamkorlikda ayollar salomatligini doimiy nazorat etish, turli kasalliklar profilaktikasini kuchaytirish, sog‘lom va barkamol avlodni tarbiyalash borasida izchil ishlar amalga oshirilmoqda.
Olmazor tumanidagi “G‘unchamed” tibbiy diagnostika markazida tashkil etilgan xayriya aksiyasida ayollar, qizlar, go‘daklar tibbiyotning turli yo‘nalishlari bo‘yicha yuqori texnologiyali tibbiy ko‘rikdan o‘tkazilib, zarur hollarda ularga shifokorlarning maslahati va muolajasi tayinlandi.
Aksiya doirasida alohida ehtiyojli oilalar vakillariga Toshkentdagi yetakchi tibbiyot markazlari, klinikalarda imtiyozli davolanish uchun yo‘llanma berildi.
Tadbirda O‘zbekiston Respublikasi Bosh vazirining o‘rinbosari, Respublika Xotin-qizlar qo‘mitasi raisi E.Bositxonova so‘zga chiqdi.
Izoh (0)