Korrupsiyaga oid jinoyatlarni sodir etganlikda gumon qilinayotgan Qozog‘istonning sobiq bosh vaziri Serik Ahmetov unga qarshi ilgari surilayotgan ayblovlarni uydirma deb hisoblamoqda va o‘zining aybsiz ekanligini isbotlovchi dalillarni taqdim etishga va’da bermoqda. Bu haqda “RIA Novosti” xabar berdi.
Ahmetov ishi bo‘yicha asosiy sud mahkamasi 10-avgust, dushanba kuni Qarag‘andi viloyati jinoyat ishlari bo‘yicha tumanlararo ixtisoslashgan sudida boshlangan edi. Sobiq bosh vazir byudjet mablag‘larini talon-taroj qilish, pora olish, xizmat mansabini suiiste’mol qilish, qonunga xilof tarzda tadbirkorlik faoliyatida qatnashishda ayblanmoqda.
Ahmetov bilan birga Qarag‘andi viloyati va Qarag‘andi shahrining bir qator sobiq amaldorlari sudlanmoqda, ular ham korrupsiyaviy jinoyatlarda ayblanmoqda.
Ahmetov oxirgi marta Qozog‘iston mudofaa vaziri sifatida ishlagan edi (2014-yil aprelidan boshlab). Bungacha u Qozog‘iston bosh vaziri (2012-yil sentabridan 2014-yil apreliga qadar), Qarag‘andi viloyati akimi (hokimi) sifatida (2009-yil noyabridan 2012-yil yanvarigacha) ishlagan.
Izoh (0)