Коррупцияга оид жиноятларни содир этганликда гумон қилинаётган Қозоғистоннинг собиқ бош вазири Серик Аҳметов унга қарши илгари сурилаётган айбловларни уйдирма деб ҳисобламоқда ва ўзининг айбсиз эканлигини исботловчи далилларни тақдим этишга ваъда бермоқда. Бу ҳақда «РИА Новости» хабар берди.
Аҳметов иши бўйича асосий суд маҳкамаси 10 август, душанба куни Қарағанди вилояти жиноят ишлари бўйича туманлараро ихтисослашган судида бошланган эди. Собиқ бош вазир бюджет маблағларини талон-тарож қилиш, пора олиш, хизмат мансабини суиистеъмол қилиш, қонунга хилоф тарзда тадбиркорлик фаолиятида қатнашишда айбланмоқда.
Аҳметов билан бирга Қарағанди вилояти ва Қарағанди шаҳрининг бир қатор собиқ амалдорлари судланмоқда, улар ҳам коррупциявий жиноятларда айбланмоқда.
Аҳметов охирги марта Қозоғистон мудофаа вазири сифатида ишлаган эди (2014 йил апрелидан бошлаб). Бунгача у Қозоғистон бош вазири (2012 йил сентябридан 2014 йил апрелига қадар), Қарағанди вилояти акими (ҳокими) сифатида (2009 йил ноябридан 2012 йил январигача) ишлаган.
Изоҳ (0)