Jurnalist Rasim Aliyevning vafotidan so‘ng, uni do‘pposlash ishi doirasida Ozarbayjonning “Gabala” futbol klubi yarim himoyachisi Javid Guseynov hibsga olindi. Bu haqda “1news.az” xabar bermoqda.
Futbolchidan tashqari yana besh kishi — uning qarindoshi Elshan Ismaylov, shuningdek, tanishlari — Jamal Mamedov, Arif Aliyev, Kyanan Madatov va Samir Mustafayev hibsga olingan.
Guseynovga nisbatan Ozarbayjon Jinoyat kodeksining ikki moddasi — “Og‘ir yoki o‘ta og‘ir jinoyatlarga tayyorgarlik ko‘rilayotganligi yoki sodir etilganligi haqida bila turib xabar qilmaslik” va “Og‘ir jinoyatlarni oldindan va’da bermasdan yashirish” moddalari bo‘yicha ayblov e’lon qilingan. Barcha gumonlanuvchilar uch oy muddatga hibsga olingan.
Mazkur shov-shuvli ish bo‘yicha tergov-surishtiruv ishlarini shaxsan Ozarbayjon prezidenti Ilhom Aliyev nazorat qilmoqda.
Jurnalist Rasim Aliyev, o‘zini Guseynovning qarindoshlari sifatida tanishtirgan noma’lum shaxslar tomonidan do‘pposlab ketilganidan so‘ng, 9-avgust kuni kasalxonada vafot etdi. Jurnalist “Gabala”ning Yevropa Ligasi 3-saralash bosqichi doirasida Kiprning “Apollon” klubiga qarshi o‘yinidan keyingi futbolchining xulqini tanqid ostiga olgandi. 27 yoshli futbolchi o‘sha o‘yindan so‘ng maydon bo‘ylab Turkiya bayrog‘ini ko‘targancha yugurgan va haqoratli imo-ishora harakatlarini amalga oshirgandi.
Izoh (0)