Журналист Расим Алиевнинг вафотидан сўнг, уни дўппослаш иши доирасида Озарбайжоннинг «Габала» футбол клуби ярим ҳимоячиси Жавид Гусейнов ҳибсга олинди. Бу ҳақда «1news.az» хабар бермоқда.
Футболчидан ташқари яна беш киши — унинг қариндоши Эльшан Исмайлов, шунингдек, танишлари — Жамал Мамедов, Ариф Алиев, Кянан Мадатов ва Самир Мустафаев ҳибсга олинган.
Гусейновга нисбатан Озарбайжон Жиноят кодексининг икки моддаси — «Оғир ёки ўта оғир жиноятларга тайёргарлик кўрилаётганлиги ёки содир этилганлиги ҳақида била туриб хабар қилмаслик» ва «Оғир жиноятларни олдиндан ваъда бермасдан яшириш» моддалари бўйича айблов эълон қилинган. Барча гумонланувчилар уч ой муддатга ҳибсга олинган.
Мазкур шов-шувли иш бўйича тергов-суриштирув ишларини шахсан Озарбайжон президенти Илҳом Алиев назорат қилмоқда.
Журналист Расим Алиев, ўзини Гусейновнинг қариндошлари сифатида таништирган номаълум шахслар томонидан дўппослаб кетилганидан сўнг, 9 август куни касалхонада вафот этди. Журналист «Габала»нинг Европа Лигаси 3-саралаш босқичи доирасида Кипрнинг «Аполлон» клубига қарши ўйинидан кейинги футболчининг хулқини танқид остига олганди. 27 ёшли футболчи ўша ўйиндан сўнг майдон бўйлаб Туркия байроғини кўтарганча югурган ва ҳақоратли имо-ишора ҳаракатларини амалга оширганди.
Изоҳ (0)