Misr prezidenti Abdulfattoh as Sisiy Suvaysh kanali maxsus iqtisodiy hududini tashkil etish haqida farmon chiqardi. Bu haqda “TASS” xabar bermoqda.
Iqtisodiy hudud Suvaysh kanali o‘zani bo‘ylab 460 kvadrat kilometr maydonda faoliyat yuritadi. Mamlakat ma’murlarining ta’kidlashicha, ushbu mintaqada xorijiy investorlarni o‘ziga jalb etishga qodir va barcha industrial xizmat turlarini taklif etadigan dunyo miqyosidagi sanoat markazi yaratiladi. Misr iqtisodiyot vazirligi taxminlariga ko‘ra, yangi iqtisodiy hududda joylashtiriladigan korxonalar keyinchalik mamlakat iqtisodiyoti umumiy hajmining uchdan bir qismini shakllantirishi mumkin.
Eslatib o‘tamiz, 6-avgust kuni Misrda 72 kilometrga cho‘zilgan va oldingidan deyarli ikki barobar ko‘p kema o‘tishini ta’minlaydigan yangi Suvaysh kanalining rasmiy ochilishi bo‘lib o‘tgandi.
Izoh (0)