Germaniya Futbol ittifoqi (DFB) 2015-yil 7-sentabrdan 25-sentyabrgacha Hennef shahridagi sport maktabida o‘zining an’anaviy Xalqaro murabbiylik kurslarini tashkillashtiradi. Bu haqda Germaniyaning Toshkentdagi elchixonasining Madaniyat va matbuot bo‘limi “Daryo”ga xabar bermoqda.
Germaniya Tashqi ishlar vazirligi tomonidan qo‘llab-quvvatlanadigan mazkur kurslar ingliz tilida olib boriladi. Seminarlar mazmunan DFB tomonidan beriladigan “A” va “B” kategoriyali litsenziyalarga mos keladi va futbol nazariyasi va amaliyotining turli aspektlarini o‘z ichiga qamrab oladi. Germaniya Futbol ittifoqi (DFB) har yili butun dunyodan 30 nafar murabbiyni ushbu kurslarga taklif qiladi va ularni Milliy futbol federatsiyalari bilan hamkorlikda tanlab oladi.
Germaniya Federativ Respublikasining O‘zbekistondagi elchisi Naythart Hyofer-Vissing 2015-yil 6-avgust kuni “Bunyodkor” futbol akademiyasi murabbiyi Yorqin Nazarovni qabul qildi. U DFB’ning joriy yildagi Xalqaro murabbiylik kurslarida O‘zbekiston nomidan ishtirok etadi.
Yorqin Nazarovni mazkur kurslarda ishtirok etishi bilan tabriklar ekan, elchi sport sohasining Germaniya va O‘zbekiston o‘rtasidagi do‘stona munosabatlarni mustahkamlashda muhim o‘rin tutishini ta’kidlab o‘tdi va Hennefdagi murabbiylik kurslarida oladigan bilimlari murabbiyga O‘zbekistonning bo‘lajak futbol yulduzlarini tayyorlashda samarali yordam berishiga umid bildirdi.
Izoh (0)