Yaponiyada rasmiy tashrif bilan bo‘lib turgan Italiya bosh vaziri Matteo Rensi mafiya bilan kurashni faollashtirish hamda "Koza nostra" jinoiy guruhining eng xavfli yetakchilaridan biri bo‘lgan Matteo Messina Denaroni hibsga olishga chaqirdi. Bu haqda “RIA Novosti” xabar bermoqda.
Oldinroq Italiya huquqni muhofaza etish idoralari Sitsiliyaning Trapani va Palermo provinsiyalaridagi jinoyatchi guruhlarini boshqargan va Denaroga yaqin bo‘lgan 11 kishini qamoqqa olgani ma’lum qilingan edi. Mafiya vakillari "Germes" deb nom olgan amaliyot chog‘ida prokuratura ko‘rsatmasiga binoan Italiya davlat politsiyasi va karabinerlar maxsus bo‘linmasi tomonidan qo‘lga tushirilgan.
Denaro 2006-yili mafiyaning “cho‘qintirgan otasi” bo‘lmish Bernardo Provensano hibsga olinganidan so‘ng "Koza nostra" norasmiy yetakchisiga aylandi. U qidiruvda bo‘lgan dunyoning 10 nafar eng xavfli jinoyatchisi ro‘yxatiga kiradi.
Izoh (0)