Xonanda Munisa Rizayevaning 2015-yilgi 19—21-oktabr kunlari Istiqlol” san’at saroyida bo‘lib o‘tadigan konserti bannerlari chiqdi, deb xabar qiladi “Sayyod.com”.
Bannerdagi “Fonogramma orqali ijro etiladi” yozuvi muxlislar o‘rtasida ko‘plab munozaralarga sabab bo‘ldi. Ammo xonandaning o‘zi bu yilgi konserti aslida jonli bo‘lib, faqatgina elektron musiqa (minus) fonogramma bo‘lishini ma’lum qildi.
“Afsuski, konsert dasturida ozgina fonogramma musiqa ishlatilsa ham, demakki, bannerga jonli ijro deb yozish mumkin emas. Konsertni necha foizi jonli o‘tadi, buni ham farqi yo‘q, shu sabab bu yilgi konsert dasturimdagi bannerlarda fonogrammadan foydalaniladi, degan yozuv bor va men o‘zimni ovozimga javob bergan holda jonli bo‘lishini ma’lum qilaman. Musiqalarimda murakkab elektron effektlari mavjud bo‘lgani sababli minus tarzida musiqasigina fonogramma bo‘ladi.
O‘zingizni ham xabaringiz bor, bugungi kunda kerak bo‘lsa mikrofonda maxsus dastur orqali ovozni “tozalab” o‘zgartirib beradigan moslamalar bor. Men kimlardir kabi jonli ijroda ham shu tariqa aldashni istamayman, ochig‘i. Borimcha kuylab, asosiysi odamlarni aldamay mehnatimni ko‘rsatib, konsertga yuz foiz kuchimni sarflamoqchiman”, — dedi Munisa Rizayeva.
Xuddi shunday voqea Toshkentga Sergey Lazarev kelganida bo‘lib o‘tib, katta janjalga sabab bo‘lgandi. Toshkentdagi bannerlarini ko‘rgan Sergey, fonogramma yozuvidan janjal ko‘targan.
“Nima uchun sizlarda musiqada fonogramma foydalanilsa, butun boshli konsertni fonogramma deb yozdirish kerak? Kuylayotgan men va meni konsertimdagi ovozim jonli bo‘lsa, nima uchun bannerga fonogramma deb yoziladi? Axir ovozim jonli-ku!”, — degandi rossiyalik xonanda.
“Jonli ovoz va musiqasi fonogrammada” deb yozilishi tartibini mutasaddi idoralar ko‘rib chiqishi kerak, deb hisoblamoqda “Sayyod.com” sayti.
Izoh (0)