Italiyaning Moden va Milan shaharlarida buyuk xonanda Luchano Pavarottiga bag‘ishlangan biryo‘la ikkita muzey ochildi. Bu haqda “TASS” xabar bermoqda.
Pavarotti jamg‘armasi xonandaning ona yurti Modenda Luchano tomonidan o‘limidan bir necha yil avval qurib bitkazilgan uyda muzey ochilganini e’lon qildi. Tashrif buyuruvchilar to‘rt qavatda joylashgan 12 xonada xonandaning 40 yillik faoliyati davomida to‘plangan kiyimlar kolleksiyasi, konsert va spektakllari videoyozuvlarini tomosha qilishi, shuningdek, Pavarottining qiziqishlaridan biri — otxonani sayr etish imkoniyatiga ega.
Modendagi uy bilan deyarli bir vaqtda Milanda Pavarottiga bag‘ishlangan restoran-muzey ham ochildi. 7 xonadan iborat va 600 kvadrat metr joyni egallagan ushbu restoranda xonanda tug‘ilib-o‘sgan Emiliya-Romanya provinsiyasi taomlari, xususan, u yoqtirgan tortellini va talyatelle kabi ovqatlar tortiladi. Muzeydan xonandaning suratlari va esdalik buyumlari ham o‘rin olgan.
Izoh (0)