O‘zbekistonning birinchi raqamli tennischisi Nigina Abduraimova Tailand poytaxti Bangkok shahrida davom etayotgan turnirning chorak finaliga yo‘l oldi, deb xabar qiladi “Olamsport.com”.
Mukofot jamg‘armasi 25 ming AQSh dollaridan iborat musobaqada uchinchi raqam ostida tasniflangan o‘zbekistonlik tennischi 15-iyul kuni ikkinchi davra bahsida kortga chiqdi va g‘alaba qozondi.
Tailandlik tennischi Patcharin Chipchandejga qarshi kortga chiqqan Abduraimova raqibasini 6:2, 6:0 hisobida dog‘da qoldirdi. Imtiyozli yo‘llanma asosida asosiy to‘rga qo‘yilgan mezbon tennischi birinchi davrada hamyurti Nudnida Luangnamdan uch set natijasiga ko‘ra ustun kelgandi. Nigina esa avstraliyalik Elison Bayni 6:3, 6:4 hisobida mag‘lub etgan edi.
Bugun, 16-iyul kuni Nigina yarim final yo‘llanmasi uchun yaponiyalik Shuka Aoyamaga qarshi kortga chiqadi.
Izoh (0)