Jahon banki vakillari guruhi “Janubiy Qoraqalpog‘istonda suv resurslarini boshqarishni yaxshilash” loyihasi amalga oshiriladigan hudud bilan yaqindan tanishish maqsadida, Qoraqalpog‘istonning Beruniy tumanida bo‘ldi. Bu haqda “12news.uz” xabar bermoqda.
2016-2021-yillarda Jahon bankining imtiyozli kreditlari va O‘zbekiston hukumati tomonidan ajratilgan mablag‘lar hisobidan amalga oshirilishi rejalashtirilayotgan loyiha umumuiy qiymati 376,7 million dollarga teng bo‘lib, uning 260 millionini kreditlar tashkil etadi.
Loyiha doirasida uzunligi 69,5 kilometr bo‘lgan betonli “Bo‘ston” magistral kanalini qurish, uzunligi 31,1 kilometr bo‘lgan O‘ng sohil Tuyamo‘yin magistral kanalini va uzunligi 27,5 kilometr bo‘lgan “Paxta-Arna” magistral kanalini rekonstruksiya qilish, umumiy uzunligi 375 kilometr bo‘lgan xo‘jaliklararo kanallarni qurish va rekonstruksiya qilish, avtomatik boshqarish elementlarini joriy etish va suv hisobini nazorat qilish orqali Qoraqalpog‘istonning Beruniy, To‘rtko‘l va Ellikqal’a tumanlarida suv ta’minotini yaxshilash ko‘zda tutilgan.
Loyihaning amalga oshirilishi uchta tumandagi 120 ming gektar sug‘oriladigan maydonlarning suv resurslaridan foydalanishni yaxshilash va kanallar tizimining foydali ish koeffitsiyentini 0,49 dan 0,6 gacha oshirish, har yili 296 million kubometrgacha suvni tejab qolish imkonini beradi. Loyihaning yana bir foydali tomoni shundaki, u fermer xo‘jaliklari va suvdan foydalanish uyushmalaridagi 544 ta nasos agregatlarini o‘chirishga imkon beradi, natijada har yili 14,5 trillion so‘m miqdoridagi elektr energiya va xizmat xarajatlari tejab qolinadi.
Izoh (0)