Aholiga maishiy xizmatlar ko‘rsatish faoliyatini amalga oshiruvchi yakka tartibdagi tadbirkorlar uchun qat’iy belgilangan soliq stavkalari hamda ularga beriladigan soliq imtiyozlari bo‘yicha Davlat soliq qo‘mitasi ma’lumot berdi.
O‘zbekiston Respublikasi Vazirlar Mahkamasining 2011-yil 7-yanvardagi 6-sonli qarori bilan tasdiqlangan Xususiy tadbirkorlar yuridik shaxs tashkil etmasdan shug‘ullanishi mumkin bo‘lgan faoliyat turlari ro‘yxatiga asosan yakka tartibdagi tadbirkorlar 31 turdagi maishiy xizmat faoliyatlarini amalga oshirishlari mumkin.
O‘zbekiston Respublikasi Soliq kodeksining 375-moddasiga asosan soliq to‘lovchining kalendar oyida ishlagan kunlari sonidan qat’iy nazar, qat’iy belgilangan soliq tadbirkorlik faoliyatining turi va soliq to‘lovchining faoliyatni amalga oshirish joyiga qarab belgilangan stavkalar bo‘yicha to‘lanadi.
Yakka tartibdagi tadbirkorlar uchun qat’iy belgilangan soliq stavkalari O‘zbekiston Respublikasi Prezidentining 2014-yil 4-dekabrdagi “O‘zbekiston Respublikasining 2015-yilgi asosiy makroiqtisodiy ko‘rsatkichlari prognozi va Davlat byudjeti parametrlari to‘g‘risida”gi PQ-2270-sonli qarorining 12-ilovasida belgilangan.
Shuningdek, mazkur qarorga asosan sartaroshlik xizmatlari, manikyur, pedikyur, kosmetolog xizmatlari va shunga o‘xshash boshqa xizmatlar bo‘yicha soliq stavkalari unifikatsiya qilinib, Toshkent shahrida eng kam oylik ish haqining 3,5 baravari, Nukus shahar va viloyat bo‘ysunuvidagi shaharlarda 1,5 baravari hamda boshqa aholi punktlarida 0,5 baravari miqdorida to‘lanishi belgilandi.
Qat’iy belgilangan soliq stavkalari yil boshiga — 2015-yil 1-yanvariga belgilangan eng kam ish haqidan (118400 so‘m) kelib chiqib aniqlanadi va eng kam ish haqi miqdori yil davomida o‘zgarganda qayta ko‘rib chiqilmaydi.
Ta’kidlash joizki, O‘zbekiston Respublikasi Prezidentining 2012-yil 10-maydagi “2012—2016-yillarda O‘zbekiston Respublikasida xizmat ko‘rsatish sohasini rivojlantirish dasturi to‘g‘risida”gi PQ-1754-sonli qaroriga asosan 2012-yilning II choragidan boshlab, qishloq joylarda yakka tartibda uy-joy qurilishi asosida barpo etilayotgan massivlarda tashkil qilinayotgan kirxonalar xizmatlarini ko‘rsatadigan yakka tartibdagi tadbirkorlar qat’iy belgilangan soliq to‘lovini to‘lashdan 5 yil muddatga ozod etilgan.
Mazkur qarorda berilgan imtiyozlar natijasida maishiy xizmat faoliyatini amalga oshirish bo‘yicha davlat ro‘yxatidan o‘tgan yakka tadbirkorlar soni 2012-yil 1-aprel holatiga nisbatan joriy yil 1 iyun holatiga 10 foizga oshgan.
Izoh (0)