Apple kitob noshirlari bilan kelishish uchun pul to‘lab kelgani to‘g‘risidagi ish bo‘yicha apellyatsiyada yutqazdi. Hi-tech.mail.ru’ning xabar berishicha, avval e’lon qilingan da’volarga asosan, kompaniya 450 million dollar miqdorida kompensatsiya puli to‘lashga majbur bo‘ladi.
Kompensatsiya pulining yakuniy miqdori apellyatsiya ishining natijalariga bog‘liq edi. Apple apellyatsiya ishida muvaffaqiyatsizlikka uchrasa, 450 million dollar to‘lashga majbur bo‘lishi o‘shandayoq ma’lum bo‘lgandi.
Agar sud Apple AQSh aksilmonopol qonunchiligini buzmagan deb topganida edi, kompaniya har qanday jarimadan qutilib qolardi. Biroq sud Apple elektron kitob noshirlari bilan kelishib, kitoblar narxining sun’iy oshishiga sabab bo‘lgani, oxir-oqibat bundan xaridorlar zarar ko‘rgani haqida xulosa qildi.
AQSh Federal apellyatsiya sudi qaroriga muvofiq, Apple to‘laydigan jarimaning asosiy miqdori zarar ko‘rgan xaridorlarga yo‘naltiriladi. Avvalroq aynan shu ish bo‘yicha kitob noshirlari xaridorlarga 166 million dollar kompensatsiya puli to‘lagan edi.
Apple’ning o‘zi sudning mazkur qarorini mutlaqo noto‘g‘ri deb hisoblamoqda. “Sud innovatsiyalar va iBooks Store xaridorlarga taklif qilngan tanlovni tan olmayotganidan afsusdamiz”, - deyiladi kompaniya bayonotida.
Izoh (0)