Rossiyaliklarning 89 foizi mamlakat prezidenti Vladimir Putinning faoliyatidan qoniqish hosil qilmoqda. “Vedomosti”ning “Levada-sentr” tadqiqot markazi ma’lumotlariga asoslanib xabar berishicha, bu barcha kuzatuvlar tarixidagi mutlaq rekord ko‘rsatkichdir.
Aprel-may oylarida Putinning prezidentlik ishini rossiyaliklarning 86 foizi, yanvarda 85 foizi, 2014-yil iyunida 86 foizi, 2013-yil iyunida 63 foizi, 2012-yil iyunida esa 64 foizi ma’qullagan edi. Hozircha respondentlarning faqat 10 foizi Putinning faoliyatidan norozi.
Dmitriy Medvedevning Rossiya bosh vaziri lavozimidagi faoliyati rossiyaliklarning 66 foiziga ma’qul, 33 foizi undan norozi. Respondentlarning 62 foizi hukumat faoliyatidan qoniqyapti, 37 foizi norozi. Parlament faoliyatini 54 foiz aholi ma’qullayapti, 44 foiz rossiyaliklarga esa bu faoliyat ma’qul emas.
Rossiya hozir to‘g‘ri yo‘ldan ketayapti, degan fikrga so‘rovnomada qatnashganlarning 64 foizi qo‘shildi – barcha kuzatuvlar tarixidagi eng yuqori ko‘rsatkichdir. Sotsiologlarning ma’lumotlariga ko‘ra, aprel-may oylarida bu ko‘rsatkich 60 foiz darajasida, yanvarda 55 foiz, 2014-yil iyunida 62 foiz, 2013-yil iyunida 41 foiz, 2012-yil iyunida 44 foizga teng edi.
So‘rovnomada ishtirok etganlarning 23 foizining fikricha esa Rossiya hozir noto‘g‘ri yo‘ldan ketmoqda, 14 foiz respondent bu savolga javob berishga qiynalishini ma’lum qildi.
So‘rovnoma 19-22-iyun kunlari davomida Rossiyaning 46 hududidagi 134 aholi yashash joylarida istiqomat qiluvchi 1,6 ming kishi orasida o‘tkazilgan. Qayd etishlaricha, statistik xatolik 3,4 foizdan oshmaydi.
Izoh (0)