Россияликларнинг 89 фоизи мамлакат президенти Владимир Путиннинг фаолиятидан қониқиш ҳосил қилмоқда. «Ведомости»нинг «Левада-центр» тадқиқот маркази маълумотларига асосланиб хабар беришича, бу барча кузатувлар тарихидаги мутлақ рекорд кўрсаткичдир.
Апрель май ойларида Путиннинг президентлик ишини россияликларнинг 86 фоизи, январда 85 фоизи, 2014 йил июнида 86 фоизи, 2013 йил июнида 63 фоизи, 2012 йил июнида эса 64 фоизи маъқуллаган эди. Ҳозирча респондентларнинг фақат 10 фоизи Путиннинг фаолиятидан норози.
Дмитрий Медведевнинг Россия бош вазири лавозимидаги фаолияти россияликларнинг 66 фоизига маъқул, 33 фоизи ундан норози. Респондентларнинг 62 фоизи ҳукумат фаолиятидан қониқяпти, 37 фоизи норози. Парламент фаолиятини 54 фоиз аҳоли маъқуллаяпти, 44 фоиз россияликларга эса бу фаолият маъқул эмас.
Россия ҳозир тўғри йўлдан кетаяпти, деган фикрга сўровномада қатнашганларнинг 64 фоизи қўшилди – барча кузатувлар тарихидаги энг юқори кўрсаткичдир. Социологларнинг маълумотларига кўра, апрель май ойларида бу кўрсаткич 60 фоиз даражасида, январда 55 фоиз, 2014 йил июнида 62 фоиз, 2013 йил июнида 41 фоиз, 2012 йил июнида 44 фоизга тенг эди.
Сўровномада иштирок этганларнинг 23 фоизининг фикрича эса Россия ҳозир нотўғри йўлдан кетмоқда, 14 фоиз респондент бу саволга жавоб беришга қийналишини маълум қилди.
Сўровнома 19-22 июнь кунлари давомида Россиянинг 46 ҳудудидаги 134 аҳоли яшаш жойларида истиқомат қилувчи 1,6 минг киши орасида ўтказилган. Қайд этишларича, статистик хатолик 3,4 фоиздан ошмайди.
Изоҳ (0)