Namanganning Irvadan qishlog‘i yaqinidagi Janubiy aylanma yo‘lida yo‘l-transport hodisasi yuz berdi. Natijada bir kishi halok bo‘ldi, yana bir kishi og‘ir ahvolda shifoxonaga tushdi, deb xabar beradi “12news.uz”.
Katta tezlikda “Lola” massivi tomon harakatlanayotgan Nexia avtomobili Rovuston qishlog‘idan kelayotgan, 18-raqam ostidagi yo‘nalishli taksi — Damas avtomobiliga kelib urilgan. Nexia mashinasini 1997-yilda tug‘ilgan, haydovchilik guvohnomasiga ega bo‘lmagan litsey o‘quvchisi boshqarib kelayotganligi surishtiruv ishlari davomida ma’lum bo‘ldi. Avtoulov uning onasiga tegishli bo‘lgan. Litsey o‘quvchisi yo‘l harakati qoidalarining 3.2, 3.5, 10.1, 12.1, 15.3 va 15.5 bandlarini buzgan.
Yo‘nalishli taksi haydovchisi bu avariyadan zarar ko‘rmagan. Ammo yo‘lovchilardan biri hayotdan ko‘z yumgan, bir kishi reanimatsiyaga tushgan va yana 4 kishi turli tan jarohatini olgan.
Halokat aybdori katta yo‘lda tezlikda harakatlanayotib, vaqtida tormoz berishga ulgurmaganini bildirgan. Litsey o‘quvchisining ota-onasi endi Damas avtomobilini ta’mirlab berishi uchun 10 million so‘m sarflashiga to‘g‘ri keladi. Nexia’ni tiklash uchun esa 7 million so‘m kerak bo‘lishi xabar qilinmoqda.
Izoh (0)