Qatar afg‘onlarga 700 ta ish o‘rni ajratadi

Qatar mehnat va ijtimoiy masalalar vazirligi afg‘on ishchilari uchun 700 ta ish o‘rni yaratilishini ma’lum qildi. Bu haqda TOLOnews xabar berdi.

Ushbu ish o‘rinlari Qatardagi kompaniyalar bilan tuzilgan yangi kelishuv doirasida taqdim etilgan. Mehnat va ijtimoiy masalalar vazirligi matbuot kotibi Samiulloh Ibrohim Afg‘oniston va Qatar o‘rtasida birinchi marotabada bandlik to‘g‘risida shartnoma imzolanganini ma’lum qilgan.

“Ilk bora Qatar davlatiga qarashli kompaniya va Afg‘oniston xususiy bandlik agentliklari o‘rtasida afg‘onlarni ish bilan ta’minlash borasida kelishuvga erishildi. Ushbu kelishuv asosida 700 nafar afg‘onlarning bandligi ta’minlandi”, dedi Ibrohim.

Afg‘onistonda 2024-yili umumiy mehnat bozoridagi ishsizlik darajasi 13,3 foizni tashkil etgan. Bu ko‘rsatkich 2023-yilda 14  foiz edi. Ayollar mehnat bozorida ayniqsa sust ishtirok etmoqda: 2023-yili ayollarning ish bilan ta’minlanganlik darjasi atigi 7  foiz bo‘lgan. Bu ko‘rsatkich erkaklarda 69  foizni tashkil etadi.

Ayollar uchun ish, ta’lim va harakat erkinligi “Tolibon” tomonidan sezilarli darajada cheklanmoqda. Shunga qaramay, ma’lumotlarga ko‘ra, hozirda taxminan 250 000 ayol uyda kichik hunarmandchilik yoki biznes bilan shug‘ullanadi.

Afg‘on mehnat uyushmasi hozirda taxminan 1,5 million fuqaro ishsiz ekanini bildirgan. Mamlakat hukumati xalqaro mehnat tashkilotlar hamda Qatar, BAA va Rossiya kabi davlatlar bilan birgalikda bandlikni ta’minlash borasida muzokaralar olib bormoqda.