“O‘zbekiston pochtasi” OAJ Jizzax filialining “Uchtepa” pochta aloqa tarmog‘iga qarashli aloqa bo‘limi boshlig‘i moddiy manfaat yo‘lida o‘zini tezda “yo‘qotib” qo‘yib, xalq ishonchini suiiste’mol qildi, deb yozadi “Huquq” gazetasi.
Uning xizmat vazifasiga aloqa bo‘limidagi moddiy boyliklarning saqlanishi va butligi, tarmoqdan kelgan madad pullarini xabarchilarga to‘liq yetkazib berish, xabarchilar ishini nazorat qilish, har besh kunda va oy yakunida tarmoqqa hisobotlar topshirish kirardi.
Nima bo‘ldi-yu, uning ko‘ziga puldan boshqasi ko‘rinmay qoldi. Moddiy manfaatni ko‘zlagan rahbar pinhona ravishda fuqarolarga beriladigan nafaqa pullarini o‘zlashtirishga kirishdi. Mansab vakolatidan foydalanib, bir yil mobaynida nafaqa pullaridan bir qismini o‘z ehtiyojlariga ishlatib yubordi. Olingan pullarni esa keyingi berilgan mablag‘ bilan yopib kelaverdi. Shuningdek, nafaqa pullarini to‘liq tarqatganligi to‘g‘risida soxta hisobotlar tuzib, “Uchtepa” pochta aloqa tarmog‘iga topshirib keldi.
O‘tkazilgan tekshirishlar natijasida uning aybi bilan 51 million 58 ming so‘mlik kamomadga yo‘l qo‘yilganligi aniqlandi. Bu pullar rahbarning ehtiyojlari yo‘lida ishlatib yuborilgan edi.
Sud hukmi bilan rahbarga tegishli jazo tayinlandi. Shuningdek, u dastlabki tergov davomida aniqlangan zararni qoplab berdi.
Izoh (0)