Firibgar navoiylik tadbirkorlarning 22 mln so‘m pulini aldov yo‘li bilan olib qo‘ydi

Muqaddam bir necha marotaba sudlangan shaxs 30 yoshni qarshilagan bo‘lsa-da, eski odatini tashlamagan ekan. Uning ikki farzandi bo‘la turib, fuqarolarni aldab, ularning mulkiga ega bo‘lishni kasb qilgan, deb yozadi “Huquq” gazetasi.

U dastlab tadbirkorlik faoliyati bilan shug‘ullanuvchi ayolning ishonchiga kiradi. “Avtomobillarga metan gaz moslamasi o‘rnatadigan ustaxona ochamiz. Foydasi o‘rtada bo‘ladi”, deb uni aldaydi. Shu yo‘l bilan ayoldan 13 million so‘m pul undiradi va ushbu mablag‘ni o‘zining ehtiyojlari uchun ishlatib yuboradi.

Birovning peshona teri bilan topgan pulini o‘zlashtirgan shaxs qing‘ir ishini yana davom ettiradi. Bu safar zarafshonlik tadbirkorning 4 million 900 ming so‘mlik va yana bir ayolning 4 million 700 ming so‘mlik mulkini oladi hamda pullarini tez kunda olib kelib berishni va’da qiladi. Biroq u qorasini ko‘rsatmadi.

Tadbirkorlarni birin-ketin chuv tushirib ketayotgan firibgar jabrlanuvchilarning tegishli organlarga qilgan murojaatidan keyin darhol qo‘lga olindi.

Sud hukmi bilan firibgarga 5 yil-u 6 oy muddatga ozodlikdan mahrum qilish jazosi tayinlandi. Shuningdek, jabrlanuvchilarga yetkazilgan zarar undiriladigan bo‘ldi.