Муқаддам бир неча маротаба судланган шахс 30 ёшни қаршилаган бўлса-да, эски одатини ташламаган экан. Унинг икки фарзанди бўла туриб, фуқароларни алдаб, уларнинг мулкига эга бўлишни касб қилган, деб ёзади «Ҳуқуқ» газетаси.
У дастлаб тадбиркорлик фаолияти билан шуғулланувчи аёлнинг ишончига киради. «Автомобилларга метан газ мосламаси ўрнатадиган устахона очамиз. Фойдаси ўртада бўлади», деб уни алдайди. Шу йўл билан аёлдан 13 миллион сўм пул ундиради ва ушбу маблағни ўзининг эҳтиёжлари учун ишлатиб юборади.
Бировнинг пешона тери билан топган пулини ўзлаштирган шахс қинғир ишини яна давом эттиради. Бу сафар зарафшонлик тадбиркорнинг 4 миллион 900 минг сўмлик ва яна бир аёлнинг 4 миллион 700 минг сўмлик мулкини олади ҳамда пулларини тез кунда олиб келиб беришни ваъда қилади. Бироқ у қорасини кўрсатмади.
Тадбиркорларни бирин-кетин чув тушириб кетаётган фирибгар жабрланувчиларнинг тегишли органларга қилган мурожаатидан кейин дарҳол қўлга олинди.
Суд ҳукми билан фирибгарга 5 йил-у 6 ой муддатга озодликдан маҳрум қилиш жазоси тайинланди. Шунингдек, жабрланувчиларга етказилган зарар ундириладиган бўлди.
Изоҳ (0)