Toshkentdagi Inha universiteti prorektori Vu Sug Cho Toshkent shahridagi Inha universiteti bilan Janubiy Koreyadagi Inha universitetidagi ta’lim uchun to‘lovlar o‘rtasidagi farqlarni tushuntirib berdi. Bu haqda Universitet matbuot xizmati xabar bermoqda.
“Agar o‘zbekistonlik talaba Toshkent shahridagi Inha universitetida emas, balki Janubiy Koreyadagi Inha universitetida tahsil olishni istasa, narxlar o‘rtasidagi quyidagi farqlarni ko‘rishimiz mumkin. Bir akademik o‘quv yili ikki semestrdan iborat va uning narxi Janubiy Koreyada 7634 AQSh dollarini tashkil qiladi, lekin xarajatlar faqat shu bilangina chegaralanmaydi. Koreyadagi Inha universitetiga borish-kelish yo‘l kira xarajatlari kamida 1000 AQSh dollariga yetadi. Koreyadagi Inha universiteti yotoqxonasida bir yillik yashash narxi 1200 AQSh dollarini tashkil etadi. Ta’lim jarayonida kitoblarni sotib olishga bir yilda kamida 300 AQSh dollari sarf etiladi, (bu borada O‘zbekistonda esa kitoblar bepul tarqatilishini alohida aytib o‘tish lozim). Janubiy Koreyada bir yildagi yeb-ichish, kiyinish, transport va umuman olganda yashash xarajatlari kamida 3600 AQSh dollarini tashkil etadi, O‘zbekistonda esa talabalar ota-onalari bilan birga yashab, ortiqcha sarf-xarajatlarga yo‘l qo‘ymaydi. Yana bir narsa. Janubiy Koreyada darsdan tashqari mashg‘ulotlarda qatnashish 902 AQSh dollari hamda sog‘liqni sug‘urtalash 70 AQSh dollariga teng. O‘zbekistonda bularga hojat yo‘q. Demak, jami xarajatlarni umumlashtiramiz. O‘zbekistonlik yoshlar Toshkent shahridagi Inha universitetida emas, balki Janubiy Koreyadagi Inha universitetida ta’lim oladigan bo‘lsa bir yilda 14 706 AQSh dollari to‘laydi. Xuddi shunday dastur bo‘yicha Toshkent shahridagi Inha universitetida o‘qishga esa Markaziy bank bugungi kunlarga belgilagan kursi bo‘yicha hisoblanganda bir yilga 12,8 million so‘mga yaqin pul (5000 dollar) to‘lanadi. O‘zbekiston sharoitida bu katta summa sifatida ko‘rilsa-da, aslida Koreyadagi holat bilan solishtirganda bir necha barobar arzondir, chunki asosiy xarajatlar universitet muassislari tomonidan qoplanadi”, — dedi prorektor.
Bundan tashqari, Vu Sug Cho ta’kidlashicha, ota-onalar xohish-istagi, iltimosiga ko‘ra, bir yillik akademik o‘quv yili uchun belgilangan summaning, ya’ni O‘zbekiston Respublikasi Markaziy banki tomonidan AQSh dollarining o‘zbek so‘miga nisbatan belgilagan kursi bo‘yicha 25 foizini dastlabki badal sifatida to‘lash mumkin. Demak, O‘zbekiston Respublikasi Markaziy banki belgilagan kursi bo‘yicha 5000 AQSh dollari hisobidan 1250 AQSh dollari to‘lanadi. Qolgan 75 foizi esa 7 oy davomida oyma-oy, teng miqdorda taqsimlangan holda amalga oshirilishi mumkin. Bu har oyda 535 AQSh dollari, yoki bugungi kundagi Markaziy bank belgilagan kursi bo‘yicha 1400 ming so‘mdan to‘g‘ri keladi.
Izoh (0)