“Ijtimoiy fikr” jamoatchilik fikrini o‘rganish markazi yoshlarning ma’naviy va hayotiy qadriyatlari, madaniyati va “ommaviy madaniyat”ga nisbatan munosabatini o‘rganish maqsadida ijtimoiy so‘rov o‘tkazdi, deb xabar beradi O‘zA.
Ijtimoiy so‘rov shuni ko‘rsatdiki, ta’lim yosh avlodning hayotiy qadriyatlari tizimida asosiy o‘rinlardan birini egallaydi. Chunonchi, 2010—2011-yillarda o‘tkazilgan ijtimoiy so‘rovlarda yoshlarning uchdan bir qismi oliy ma’lumotli bo‘lish istagini bildirgan bo‘lsa, 2013-yilda har ikkinchi (57,2 foiz), 2015-yilda esa 73 foiz yigit-qiz oliy ta’lim muassasasida o‘qishni xohlashini bildirgan.
Tadqiqot natijalariga ko‘ra, yosh avlod vakillari ta’lim jarayonida chet tillarni o‘rganishga alohida e’tibor qaratayotir.
Yoshlarning ma’naviy-axloqiy va hayotiy qadriyatlarini o‘rganish natijalari shundan dalolat beradiki, yoshlar oila, o‘quv muassasasi, mahalla, ommaviy axborot vositalari, ayniqsa, televideniye ma’naviyatni yuksaltirishga ta’sir ko‘rsatadigan muhim omil deb biladi. Mamlakat yoshlarining ijtimoiy ongida oila muhim tarbiya muhiti, degan fikr mustahkam o‘rin olgan. So‘rovga muvofiq, ishtirokchilarning mutlaq ko‘pchiligi o‘sib kelayotgan avlodni ma’naviy-axloqiy tarbiyalashda oila muhim o‘rin tutishini qayd etdi.
Ijtimoiy tadqiqotga ko‘ra, 80 foizdan ziyod o‘g‘il-qiz sport turlari bilan muntazam shug‘ullanib kelmoqda.
Shunisi e’tiborga loyiqki, ijtimoiy so‘rovda yoshlar ongi sezilarli darajada o‘sgani aniqlandi. Bu O‘zbekiston yoshlari dunyoqarashining kengayib borayotgani, ularda vatanparvarlik, o‘z Vatani bilan faxrlanish va unga sodiqlik tuyg‘usi rivojlanayotganidan dalolat beradi.
Yoshlarning aksariyati (94,3 foizi) mustaqillik yillarida yosh avlod vakillarining vatanparvarlik tuyg‘usi mustahkamlanganini ta’kidladi. Tadqiqot ishtirokchilarining deyarli barchasi o‘z yashash joyi, jinsi, yoshi, oilaviy holati, ma’lumoti va millatidan qat’iy nazar, shunday fikrni bildirdi. Ularning fikricha, vatanparvarlik tuyg‘usi Vatanga sadoqat va muhabbat, uning manfaatlarini himoya qilish, mamlakatining buyuk kelajagi uchun kurashish, xalqining tarixi, madaniyati va milliy urf-odatlarini bilish va hurmat qilishda o‘z ifodasini topmoqda.
Muxtasar aytganda, ushbu ijtimoiy tadqiqot yoshlarning aksariyati hayotidan mamnunligi va Ona Vatani bilan faxrlanishini ko‘rsatdi.
Izoh (0)