O‘zbekiston milliy matbuot markazida “O‘zbekiston Respublikasida nogironlarni ijtimoiy himoya qilish masalalari borasida Mehnat va aholini ijtimoiy muhofaza qilish vazirligi tomonidan amalga oshirilayotgan ishlar” mavzusida matbuot anjumani bo‘lib o‘tdi. Bu haqda Mehnat va aholini ijtimoiy muhofaza qilish vazirligi axborot xizmati “Daryo”ga ma’lum qildi.
Matbuot anjumanida ommaviy axborot vositalari hodimlariga Vazirlik tomonidan Respublikada istiqomat qilayotgan 600 ming nogironlarga ko‘rsatilayotgan ijtimoiy xizmatlar haqida ma’lumot berildi.
Nogironlarni reabilitatsiya qilish maqsadida Vazirlik tizimida 11 ta markaz faoliyat yuritadi. Markazlarda jami 720 ta joy mavjud. Har yili bunday tibbiy muassasalarda 17,5 mingdan ziyod nogironlar reabilitatsiyadan o‘tkaziladi.
2015-yil 1-iyunga qadar 2971 ta nogironlar reabilitatsiya texnik anjomlari bilan ta’minlandi, bulardan 948 tasi nogironlar aravachasi, 561 tasi eshitish moslamalari, 491 tasi qo‘ltiq tayoq, 971 tasi hassa tayoqlardir.
Imkoniyatlari cheklangan bolalar uchun Farg‘ona va Toshkent shaharlarida ixtisoslashtirilgan kasb-hunar kollejlari faoliyat yuritmoqda. Kasb-hunar kollejlarida nogironlar uchun qulay shart sharoitlar yaratilgan bo‘lib imkoniyatlari cheklangan o‘quvchilarni chuqurlashtirilgan, ixtisosli o‘qitish, intellektual rivojlantirishni ta’minlash va ularning jismoniy kamol topishi xususiyatlariga muvofiq tanlangan kasblar bo‘yicha mutaxassislikni egallashi asosiy maqsad qilib olingan.
Mehnat va aholini ijtimoiy muhofaza qilish vazirligi tasarrufidagi “Muruvvat” va “Sahovat” uylari urush qatnashchilari, boquvchisini yo‘qotgan keksa nogironlarni jismonan ruhan sog‘liqlarini tiklashda xizmat qilib kelmoqda.
Izoh (0)