Тошкентдаги Инҳа университети проректори Ву Суг Чо Тошкент шаҳридаги Инҳа университети билан Жанубий Кореядаги Инҳа университетидаги таълим учун тўловлар ўртасидаги фарқларни тушунтириб берди. Бу ҳақда Университет матбуот хизмати хабар бермоқда.
«Агар ўзбекистонлик талаба Тошкент шаҳридаги Инҳа университетида эмас, балки Жанубий Кореядаги Инҳа университетида таҳсил олишни истаса, нархлар ўртасидаги қуйидаги фарқларни кўришимиз мумкин. Бир академик ўқув йили икки семестрдан иборат ва унинг нархи Жанубий Кореяда 7634 АҚШ долларини ташкил қилади, лекин харажатлар фақат шу билангина чегараланмайди. Кореядаги Инҳа университетига бориш-келиш йўл кира харажатлари камида 1000 АҚШ долларига етади. Кореядаги Инҳа университети ётоқхонасида бир йиллик яшаш нархи 1200 АҚШ долларини ташкил этади. Таълим жараёнида китобларни сотиб олишга бир йилда камида 300 АҚШ доллари сарф этилади, (бу борада Ўзбекистонда эса китоблар бепул тарқатилишини алоҳида айтиб ўтиш лозим). Жанубий Кореяда бир йилдаги еб-ичиш, кийиниш, транспорт ва умуман олганда яшаш харажатлари камида 3600 АҚШ долларини ташкил этади, Ўзбекистонда эса талабалар ота-оналари билан бирга яшаб, ортиқча сарф-харажатларга йўл қўймайди. Яна бир нарса. Жанубий Кореяда дарсдан ташқари машғулотларда қатнашиш 902 АҚШ доллари ҳамда соғлиқни суғурталаш 70 АҚШ долларига тенг. Ўзбекистонда буларга ҳожат йўқ. Демак, жами харажатларни умумлаштирамиз. Ўзбекистонлик ёшлар Тошкент шаҳридаги Инҳа университетида эмас, балки Жанубий Кореядаги Инҳа университетида таълим оладиган бўлса бир йилда 14 706 АҚШ доллари тўлайди. Худди шундай дастур бўйича Тошкент шаҳридаги Инҳа университетида ўқишга эса Марказий банк бугунги кунларга белгилаган курси бўйича ҳисобланганда бир йилга 12,8 миллион сўмга яқин пул (5000 доллар) тўланади. Ўзбекистон шароитида бу катта сумма сифатида кўрилса-да, аслида Кореядаги ҳолат билан солиштирганда бир неча баробар арзондир, чунки асосий харажатлар университет муассислари томонидан қопланади», — деди проректор.
Бундан ташқари, Ву Суг Чо таъкидлашича, ота-оналар хоҳиш-истаги, илтимосига кўра, бир йиллик академик ўқув йили учун белгиланган сумманинг, яъни Ўзбекистон Республикаси Марказий банки томонидан АҚШ долларининг ўзбек сўмига нисбатан белгилаган курси бўйича 25 фоизини дастлабки бадал сифатида тўлаш мумкин. Демак, Ўзбекистон Республикаси Марказий банки белгилаган курси бўйича 5000 АҚШ доллари ҳисобидан 1250 АҚШ доллари тўланади. Қолган 75 фоизи эса 7 ой давомида ойма-ой, тенг миқдорда тақсимланган ҳолда амалга оширилиши мумкин. Бу ҳар ойда 535 АҚШ доллари, ёки бугунги кундаги Марказий банк белгилаган курси бўйича 1400 минг сўмдан тўғри келади.
Изоҳ (0)