2015-yilning 16-iyun kuni Toshkentda Xalq ta’limi vazirligi tomonidan bilimlar bellashuvining yakuniy bosqichiga start berildi. Bu haqda O‘zbekiston Respublikasi Xalq ta’limi vazirligi Axborot xizmati xabar bermoqda.
Tanlovning mazkur bosqichi oldidan tashkil etilgan brifingda Xalq ta’limi vaziri, boshqarma boshliqlar va ommaviy axborot vositalari xodimlari ishtirok etdi.
Bilimlar bellashuvi 5—8-sinf o‘quvchilari o‘rtasida 17 ta umumta’lim fanlaridan tashkil etilib, tanlov maktab, tuman (shahar), viloyat, respublika bosqichlarida o‘tkaziladi. Bu yilgi bilimlar bellashuvining dastlabki bosqichlarida 2 million 100 ming nafardan ortiq o‘quvchilar ishtirok etdi. Ular orasidan yuqori o‘rinlarni qo‘lga kiritgan 500 nafar o‘quvchi bellashuvning respublika bosqichiga qatnashish huquqini qo‘lga kiritdi.
16—17-iyun kunlari o‘quvchilar aniq, tabiiy va ijtimoiy fanlar (matematika, fizika, informatika, kimyo, biologiya, geografiya, tarix, huquq, iqtisodiy bilim asoslari fanlari) yo‘nalishida 29—30-iyun kunlari esa filologiya fanlari (ona tili va adabiyot, ingliz, fransuz, nemis tili, o‘zbek tili va rus tili) yo‘nalishida o‘z bilimlarini sinovdan o‘tkazadi.
Bu yilgi bellashuvlarning avvalgilaridan farqi umumiy o‘rta ta’lim maktablari va ayrim fanlar chuqur o‘rganiladigan davlat ixtisoslashtirilgan umumta’lim maktablari o‘quvchilari o‘rtasida alohida-alohida o‘tkaziladi.
Mazkur bosqichga etib kelgan barcha o‘quvchilar “Yozgi Intellektual rivojlantirish oromgohi”da dam olish yo‘llanmasini qo‘lga kiritdi.
Izoh (0)