Ўзбекистон миллий матбуот марказида «Ўзбекистон Республикасида ногиронларни ижтимоий ҳимоя қилиш масалалари борасида Меҳнат ва аҳолини ижтимоий муҳофаза қилиш вазирлиги томонидан амалга оширилаётган ишлар» мавзусида матбуот анжумани бўлиб ўтди. Бу ҳақда Меҳнат ва аҳолини ижтимоий муҳофаза қилиш вазирлиги ахборот хизмати «Дарё»га маълум қилди.
Матбуот анжуманида оммавий ахборот воситалари ҳодимларига Вазирлик томонидан Республикада истиқомат қилаётган 600 минг ногиронларга кўрсатилаётган ижтимоий хизматлар ҳақида маълумот берилди.
Ногиронларни реабилитация қилиш мақсадида Вазирлик тизимида 11 та марказ фаолият юритади. Марказларда жами 720 та жой мавжуд. Ҳар йили бундай тиббий муассасаларда 17,5 мингдан зиёд ногиронлар реабилитациядан ўтказилади.
2015 йил 1 июнга қадар 2971 та ногиронлар реабилитация техник анжомлари билан таъминланди, булардан 948 таси ногиронлар аравачаси, 561 таси эшитиш мосламалари, 491 таси қўлтиқ таёқ, 971 таси ҳасса таёқлардир.
Имкониятлари чекланган болалар учун Фарғона ва Тошкент шаҳарларида ихтисослаштирилган касб-ҳунар коллежлари фаолият юритмоқда. Касб-ҳунар коллежларида ногиронлар учун қулай шарт шароитлар яратилган бўлиб имкониятлари чекланган ўқувчиларни чуқурлаштирилган, ихтисосли ўқитиш, интеллектуал ривожлантиришни таъминлаш ва уларнинг жисмоний камол топиши хусусиятларига мувофиқ танланган касблар бўйича мутахассисликни эгаллаши асосий мақсад қилиб олинган.
Меҳнат ва аҳолини ижтимоий муҳофаза қилиш вазирлиги тасарруфидаги «Мурувват» ва «Саҳоват» уйлари уруш қатнашчилари, боқувчисини йўқотган кекса ногиронларни жисмонан руҳан соғлиқларини тиклашда хизмат қилиб келмоқда.
Изоҳ (0)