«Ижтимоий фикр» жамоатчилик фикрини ўрганиш маркази ёшларнинг маънавий ва ҳаётий қадриятлари, маданияти ва «оммавий маданият»га нисбатан муносабатини ўрганиш мақсадида ижтимоий сўров ўтказди, деб хабар беради ЎзА.
Ижтимоий сўров шуни кўрсатдики, таълим ёш авлоднинг ҳаётий қадриятлари тизимида асосий ўринлардан бирини эгаллайди. Чунончи, 2010—2011 йилларда ўтказилган ижтимоий сўровларда ёшларнинг учдан бир қисми олий маълумотли бўлиш истагини билдирган бўлса, 2013 йилда ҳар иккинчи (57,2 фоиз), 2015 йилда эса 73 фоиз йигит-қиз олий таълим муассасасида ўқишни хоҳлашини билдирган.
Тадқиқот натижаларига кўра, ёш авлод вакиллари таълим жараёнида чет тилларни ўрганишга алоҳида эътибор қаратаётир.
Ёшларнинг маънавий-ахлоқий ва ҳаётий қадриятларини ўрганиш натижалари шундан далолат берадики, ёшлар оила, ўқув муассасаси, маҳалла, оммавий ахборот воситалари, айниқса, телевидение маънавиятни юксалтиришга таъсир кўрсатадиган муҳим омил деб билади. Мамлакат ёшларининг ижтимоий онгида оила муҳим тарбия муҳити, деган фикр мустаҳкам ўрин олган. Сўровга мувофиқ, иштирокчиларнинг мутлақ кўпчилиги ўсиб келаётган авлодни маънавий-ахлоқий тарбиялашда оила муҳим ўрин тутишини қайд этди.
Ижтимоий тадқиқотга кўра, 80 фоиздан зиёд ўғил-қиз спорт турлари билан мунтазам шуғулланиб келмоқда.
Шуниси эътиборга лойиқки, ижтимоий сўровда ёшлар онги сезиларли даражада ўсгани аниқланди. Бу Ўзбекистон ёшлари дунёқарашининг кенгайиб бораётгани, уларда ватанпарварлик, ўз Ватани билан фахрланиш ва унга содиқлик туйғуси ривожланаётганидан далолат беради.
Ёшларнинг аксарияти (94,3 фоизи) мустақиллик йилларида ёш авлод вакилларининг ватанпарварлик туйғуси мустаҳкамланганини таъкидлади. Тадқиқот иштирокчиларининг деярли барчаси ўз яшаш жойи, жинси, ёши, оилавий ҳолати, маълумоти ва миллатидан қатъий назар, шундай фикрни билдирди. Уларнинг фикрича, ватанпарварлик туйғуси Ватанга садоқат ва муҳаббат, унинг манфаатларини ҳимоя қилиш, мамлакатининг буюк келажаги учун курашиш, халқининг тарихи, маданияти ва миллий урф-одатларини билиш ва ҳурмат қилишда ўз ифодасини топмоқда.
Мухтасар айтганда, ушбу ижтимоий тадқиқот ёшларнинг аксарияти ҳаётидан мамнунлиги ва Она Ватани билан фахрланишини кўрсатди.
Изоҳ (0)