2015 йилнинг 16 июнь куни Тошкентда Халқ таълими вазирлиги томонидан билимлар беллашувининг якуний босқичига старт берилди. Бу ҳақда Ўзбекистон Республикаси Халқ таълими вазирлиги Ахборот хизмати хабар бермоқда.
Танловнинг мазкур босқичи олдидан ташкил этилган брифингда Халқ таълими вазири, бошқарма бошлиқлар ва оммавий ахборот воситалари ходимлари иштирок этди.
Билимлар беллашуви 5—8-синф ўқувчилари ўртасида 17 та умумтаълим фанларидан ташкил этилиб, танлов мактаб, туман (шаҳар), вилоят, республика босқичларида ўтказилади. Бу йилги билимлар беллашувининг дастлабки босқичларида 2 миллион 100 минг нафардан ортиқ ўқувчилар иштирок этди. Улар орасидан юқори ўринларни қўлга киритган 500 нафар ўқувчи беллашувнинг республика босқичига қатнашиш ҳуқуқини қўлга киритди.
16—17 июнь кунлари ўқувчилар аниқ, табиий ва ижтимоий фанлар (математика, физика, информатика, кимё, биология, география, тарих, ҳуқуқ, иқтисодий билим асослари фанлари) йўналишида 29—30 июнь кунлари эса филология фанлари (она тили ва адабиёт, инглиз, француз, немис тили, ўзбек тили ва рус тили) йўналишида ўз билимларини синовдан ўтказади.
Бу йилги беллашувларнинг аввалгиларидан фарқи умумий ўрта таълим мактаблари ва айрим фанлар чуқур ўрганиладиган давлат ихтисослаштирилган умумтаълим мактаблари ўқувчилари ўртасида алоҳида-алоҳида ўтказилади.
Мазкур босқичга этиб келган барча ўқувчилар «Ёзги Интеллектуал ривожлантириш оромгоҳи»да дам олиш йўлланмасини қўлга киритди.
Изоҳ (0)