Britaniya qirolligi taxtiga navbat bo‘yicha ikkinchi da’vogar shahzoda Uilyam va uning turmush o‘rtog‘i – Kembridj gersoginyasi Keytning ikkinchi farzandi – malika Sharlottaning suratlari ilk bor ommaga namoyish etildi. “TASS”ning xabar berishicha, hali bir oylik ham bo‘lmagan chaqaloq suratlari shanba kuni Kensington saroyi tomonidan e’lon qilindi.
Gersoglar rasmiy qarorgohining tasdiqlashicha, suratlar malikaning onasi tomonidan suratga olingan. U may oyi o‘rtalarida Sandringemdagi mulkda hordiq chiqarayotganida, o‘g‘li va qizini birgalikda suratga tushirgan.
Suratda 22-iyul kuni ikki yoshga to‘ladigan shahzoda Jorj chap qo‘li bilan singlisini ohista ushlab turgani, malika esa oppoq yostiqda yotganini ko‘rish mumkin. Suratlarning birida esa Jorj singlisining peshonasidan o‘pib qo‘yayotgani tasvirlangan
Sharlotta Yelizaveta Diana 2-may kuni Londondagi Avliyo Mariya shifoxonasida dunyoga keldi. Uning birinchi ismi bobosining ismi – shahzoda Charlzning qizlarga mo‘ljallangan ko‘rinishi bo‘lib, ikkinchi ismi esa katta buvisi – qirolicha Yelizaveta II sharafiga, uchinchi ismi marhum buvisi – Uels malikasi Diana sharafiga qo‘yilgan.
Sharlotta bobosi shahzoda Charlz, otasi shahzoda Uilyam va akasi Jorjdan so‘ng Britaniya qirolligi taxtiga to‘rtinchi da’vogar bo‘ldi. Malikani cho‘qintirish marosimi 5 iyul kuni bo‘lib o‘tadi.
Izoh (0)